Додека се подготвуваме за уживање во продолжениот празничен викенд, сајбер-криминалците се подготвуваат за напад. Токму во вакви денови, кога многумина се релаксирани, патуваат или купуваат онлајн, сајбер измамниците стануваат особено активни.
Зошто баш за празници?
Истражувањата покажуваат дека сајбер нападите се зголемуваат до 30% за време на празници и викенди. Причината? Понизок степен на будност кај луѓето и помалку активен ИТ надзор во институциите и компаниите. Најчесто таргетирани се поединци преку е-пошта, социјални мрежи или лажни веб-страници за „празнични попусти“.
Може, на пример, да добиете е-пошта со наслов „Ексклузивен попуст за Вас – само денес!“. Во пораката има линк до страница што изгледа речиси идентично со популарна продавница за облека. Но, доколку внесете податоците од картичката, сметката може да ви биде испразнета за неколку минути, без да добиете нешто за возврат.
На што да внимавате?
• Не кликајте линкови од непознати е-пошта адреси. Дури и ако изгледаат легитимно, проверете ја адресата внимателно.
• Избегнувајте онлајн купување преку јавен Wi-Fi.
• Активирајте двофакторска автентикација на вашите онлајн профили и банкарски сметки.
• Следете го движењето на вашите средства. Веднаш пријавете сомнителна трансакција.
• Не споделувајте лични податоци по телефон или порака, дури и ако изгледа како да е од банка или позната институција.
Според податоци од глобални истражувања, најголем број на успешни сајбер измами се случуваат во петок попладне, токму кога сите мислиме на викендот – а не на безбедноста.
Пред да кликнете, прашајте се: „Дали ова изгледа предобро за да е вистинито?“– често, одговорот е „да“.
Безбедни празници – и останете внимателни.
